ჯანი ბუკიკიო -“ყველაფერი ისევ ჰაერშია და ეს სამწუხაროა”

“იყავით კონსტრუქციულები და არა დესტრუქციულები, ბოლო გადაწყვეტილებების შემდეგ ახლა ყველაფერი ჰაერშია”, – მორიგი კრიტიკული განცხადება საკონსტიტუციო კანონპროექტთან დაკავშირებით ვენეციის კომისიის პრეზიდენტმა გააკეთა.

ჯანი ბუკიკიოს თქმით, პოლიტიკურმა პარტიებმა უნდა გამონახონ გადაწყვეტილება, რომელიც შესაბამისობაში იქნება მათ რეკომენდაციებთან და საერთაშორისო სტანდარტებთან. მისი განცხადებით, ყველა დაინტერესებულმა მხარემ ყველაფერი უნდა გააკეთოს, რათა საკონსტიტუციო რეფორმის პროცესი დასრულდეს.

“საქართველოში მნიშვნელოვან პერიოდში ჩამოვედით, იმისთვის, რომ საბოლოოდ თქვენ ქვეყანას ევროპული სტანდარტების შესაბამისი კონსტიტუცია ჰქონდეს, რადგან საქართველო ევროპული ქვეყანაა და თქვენ გაქვთ ევროპული მისწრაფებები. ყველა დაინტერესებულმა მხარემ და პოლიტიკურმა პარტიამ ყველაფერი უნდა გააკეთოს იმისთვის, რომ კონსტიტუციის რეფორმირების პროცესი დასრულდეს. საქართველოს პოლიტიკურმა პარტიებმა უნდა მიიღონ გადაწყვეტილება, რომელიც შესაბამისობაში იქნება ჩვენს მოსაზრებებთან და ზოგადად, საერთაშორისო სტანდარტებთან. ყველა საკონსტიტუციო რეფორმა, რაც შეიძლება ფართო კონსენსუსს საჭიროებს, არა მარტო პარტიების, არამედ საზოგადოებისა და არასამთავრობო სექტორის მხრიდანაც. მე დარწმუნებული ვარ, რომ ის რაც აქამდე გაკეთდა, კარგია, გარდა რამდენიმე ნიუანსისა, რომლის გამოსწორებაც შეიძლება. მაგრამ ახლა, ბოლო პერიოდში მიღებული გადაწყვეტილებების გამო, ყველაფერი ისევ ჰაერშია და ეს სამწუხაროა. პოლიტიკურ პარტიებთან შეხვედრაზე იგივე პოლიტიკურ მესიჯს გავიმეორებ – იყავით კონსტრუქციულები და არა დესტრუქციულები,” – განაცხადა ბუკიკიომ.

მსგავსი პოსტები

Back to top button